aksharyatra

३००१ द फायनल ओडिसी-आर्थर सी. क्लार्क

2009-04-15T19:52:00.000-07:00

चाळीस लाख वर्षांपूर्वी त्या चकाकणारया काळ्या पाषाणाने मानवपणाची ठिणगी टाकून मानवी उत्क्रांतीला चालना दिली. एकविसाव्या शतकात तसाच काळा पाषाण चंद्रावर सापडला. त्यानंतर डेव्ह बौमन, फ्रँक पूल आणि त्यांचा महासंगणक हअल यांच्या धाडसी मोहिमेला सुरूवात झाली.

गुरूचा उपग्रह असणारया युरोपावरच्या तिसरया पण अतिभव्य पाषाणाशी झालेल्या झगड्यामध्ये फ़क्त डेव्ह बौमन वाचला.त्याच यंत्र-मानवात रूपांतर झालं.

सन ३००१.... मानवजात अजून आश्चर्यकारकरित्या टिकून आहे. तिन्ही पाषाणांचं सूर्यमालेवर वर्चस्व आहे. अचानक हजार वर्षापूर्वी अंतराळात हरवलेल्या फ्रँक पूलचा शोध लागतो. गोठलेल्या अवस्थेमधल्या फ्रँक पूलला पुन्हा जागं करण्यात येतं. हजार वर्षापूर्वी गुरू ग्रहाकडे गेलेल्या मोहिमेमधलं मुख्य काम पूर्ण करण्यासाठी फ्रँक युरोपाकडे जातो आणि पाषाणानं ओढून घेतलेला डेव्ह बौमन आणि महासंगणक हअल त्यांना माहीत झालेलं भीषण सत्य सांगतात.
मानवजातीचं भवितव्य त्याच्याशी निगडित आहे....

३००१ द फायनल ओडिसी
मूळ लेखक: आर्थर सी. क्लार्क
अनुवाद: डॉ. प्रमोद जोगळेकर
प्रकाशन: मेहता पब्लिशिंग हाउस

'टू कट अ लाँग स्टोरी शॉर्ट'

2009-04-05T11:14:00.000-07:00

पात्रयोजना,कथानक, विषय आणि पार्श्वभूमी
या सर्वच बाबतीत वैशिष्ट्यपूर्ण ठरणारया
जेफ्री आर्चर यांच्या कथांचा हा संग्रह.

या सर्वच कथांतून जेफ्री आर्चर यांच्या लेखणीचे कसब आणि लालित्य दिसून येते. प्रत्येक
वाचकाला या कथासंग्रहात स्वत:च्या पसंतीची
एकतरी कथा हमखास सापडेल.

यात रेल्वेस्टेशनवर समोरासमोरच्या प्लॅटफॉर्मवर
झालेली नजरानजर व त्यातून फुलून आलेली प्रेमकथा आहे; प्रचंड आत्मविश्वासाने खेळलेल्या
बाजीची कथा आहे, कायद्याला हवे तसे
वाकवणारया कायदेतज्ज्ञाची कथा आहे तसेच ,
एक तरूणीची अत्यंत विलक्षण , सुरस आणि
चमत्कारिक कथा आहे. शेवटची 'द ग्रास इज ऑलवेज ग्रीनर' अर्थात 'दुरून डोंगर साजरे' ही
सर्वोत्कृष्ट म्हणावी अशी कथा आहे.

प्रत्येक कथेच्या शेवटाला जेफरी आर्चर यांनी एक
नाट्यपूर्ण कलाटणी दिलेली आहे. म्हणूनच हा
शेवट धक्कादायक वाटतो.
यातील अनेक विस्मयकारक कथा या सत्यघटनेवर आधारित आहेत.

'टू कट अ लाँग स्टोरी शॉर्ट' (To cut a long story short by Jefree Archer )
मूळ लेखक: जेफ्री आर्चर
अनुवाद: लीना सोहोनी
प्रकाशन: मेहता पब्लिशिंग हाउस

निसर्गपुत्र

2009-03-25T19:09:00.000-07:00

आफ्रिकेच्या जंगलात जावून वावरावं , असं त्याला लहानपणापासून वाटत होतं।
त्यासाठी त्याची तयारी म्हणजे
एक हंटिंग नाईफ... बस !

तो जंगलात शिरला , तेव्हा त्याला उपाशी राहावं लागलं.
आदिवासींनी दया येवून दिलेलं अन्न खाणं त्याच्या जिवावर आलं. मग तो अन्न चोरायची कला शिकला आणि सिंहाच्या तावडीत सापडला.

त्याला जन्मतःच एक शाप होता. त्याला अपस्माराचे झटके यायचे. पण हा शाप आफ्रिकेत वरदान ठरला. त्यामुळे आफ्रिकनांनी त्याला आपलं म्हटलं. यामुळेच त्याच्या हातून खूप शोध लागले.

अशा या एका विचित्र संशोधकाची ही कथा.
' द लायटनिंग बर्ड' अथवा विदुल्लता पक्षी.

निसर्गपुत्र
मूळ लेखक : लायल वाटसन
मराठी अनुवाद: निरंजन घाटे
प्रकाशक: मेहता पब्लिशिंग हाऊस

ओ हेन्रीज अमेरिकन सीन्स

2009-03-15T08:24:00.000-07:00

ओ ' हेन्री यांच्या उत्कृष्ट पंधरा कथा.
प्रेम-दु:ख-आशा-आणि-आनंद-
या मानवी भावनांशी संबंधित या कथा आहेत.
लघुकथेतील 'जाने-माने' कथाकार-
'ओ हेनरी' यांच्या या उत्कृष्ट कथा आहेत.
त्या प्रत्येक कथेतील शेवट-
वाचकांना आश्चर्याचा धक्का देतो.

नॉर्थ कँरोलिना येथे प्रथम ते
'विल्यम सिडने पोर्टर' या नावाने
वास्तव्य करीत होते.
त्यानी आपल्या लिखाणाची
सुरूवात टेक्सासच्या तुरूंगात केली.

त्यांच्या इतर कथांपेक्षा
'न्यूयॉर्क' झाले शहराबद्दलच्या त्यांच्या
पंधरा कथा जास्त प्रसिद्ध आहेत.
त्याच शहरात
'ओ हेनरी' यांचे १९१० साली निधन झाले .
ओ हेन्रीज अमेरिकन सीन्स'
अनुवाद: अरूण डावखरे
पॅपिलॉन पब्लिशिंग हाऊस

मृत्युपेटीत पाच दिवस व इतर साहसकथा-विजय देवधर

2009-03-05T00:51:00.000-08:00

किडनँपर्सनी त्याला जमिनीखाली- एका लाकडी पेटीमध्ये-जिवंतपणी पुरून ठेवलं होतं...! त्याच्या सुटकेच्यामोबदल्यात त्यांनी पाऊण लाख डॉलर्सची मागणी केली होती. मृत्यूपेटीत गाडल्या गेलेल्या मायकेल बाकम यातरूणाची अंगावर शहारे आणणारी भीषण कहाणी...!!

ज्या कथांची वाचक आतुरतेनं वाट पाहत होते त्या दुर्मीळ कथा...
एकदा वाचायला घेतल्यावर खाली ठेववणार नाही असा अजोड साहसकथासंग्रह.

रसिक वाचकांना आवडेल अशी एक अनुपम पेशकश !
मृत्युपेटीत पाच दिवस व इतर साहसकथा
लेखक : विजय देवधर
सौजन्य: नवचैतन्य प्रकाशन

नरभक्षकांच्या जबड्यात ! -ओसा जॉन्सन

2009-02-25T19:12:00.000-08:00

मार्टिन जॉन्सन व ओसा जॉन्सन हे एक जगावेगळे अमेरिकन जोडपे.
मार्टिन हा हौशी छायाचित्रकार. ऐन विशीत तो विख्यात प्रदेश-संशोधक जॅक लंडन याच्याबरोबर जलमार्गाने जगपर्यटन करून आला. त्याच्या पराक्रमावर मोहित होउन ओसाने मार्टिनशी लग्न केले. एवढेच नव्हे तर लग्नानंतरओसाने त्याच्याबरोबर सातासमुद्रापलीकडे एकूण सहा वेळा धाडसी पृथ्वीप्रदक्षिणा केल्या. त्याच्या जोडीने तीअज्ञात निसर्गाशी झगडली, हिंस्रश्वापदांना सामोरी गेली, आणि निबिड़ अरण्यातल्या आदिवासी नरभक्षकांच्या जबड्यातही खुशाल उतरली ! मार्टिनने शेकडो स्थिर छायाचित्रे घेतली , हजारो फूट लांबीचे चलचित्रपट तयार केले. ओसाने आपल्या धाडशी अनुभवांवर काही पुस्तके लिहिली. त्यांपैकीच ही तिची स्वत:ची अत्यंत नाट्यपूर्ण आत्मकथा !

I Married Adventure

या ओसा जॉन्सन यांच्या पुस्तकाचा संक्षिप्त अनुवाद.
नरभक्षकांच्या जबड्यात !
लेखिका : ओसा जॉन्सन
अनुवाद : रंगा मराठे
राजहंस प्रकाशन

'चीपर बाय द डझन'

2009-02-15T07:41:00.000-08:00

' Cheaper by the dozen' हे फ्रँक गिलबर्ट या गृहस्थावर त्यांच्या एक मुलाने व मुलीने मिळून लिहिलेले पुस्तकचरित्रवजा असूनही, ते इतके मनोवेधक व मनोरंजक आहे , की पूर्ण केल्याशिवाय खाली ठेववत नाही.
हे गृहस्थ व्यवसायाने इंजिनियर ! कमीत कमी वेळात जास्तीत जास्त कामे कुशलतेने कशी करावीत, यावर ते संशोधन करत व त्याचे आपल्या मुलांवर प्रयोगही करून पाहत. खास वेळ न खर्चता , स्नान करता-करता, फ्रेंच भाषेच्या टेप्स ऐकवून त्यानी मुलांना उत्तम फ्रेंच बोलायला शिकविले होते. असे अनेक प्रयोग त्यांनी आपल्यामुलांवर केले होते. त्यांची फिल्म त्यावेळी अनेक अमेरिकन चित्रपटगृहांत दाखवली जात असे.
आपल्याकडच्या जास्तीतजास्त लोकांनी ते वाचावे व अंमलात आणावे, असे वाटले म्हणूनच त्याचा हा अनुवाद सिध्द करून वाचकांसमोर ठेवला आहे .

'चीपर बाय द डझन'
मूळ लेखक : फ्रँक बंकर गिलबर्थ(ज्यूँ.) , अर्नेस्टाईन गिलबर्थ कॅरे
अनुवाद : मंगला निगुडकर
मेहता पब्लिशिंग हाऊस

'अरण्यकांड' या कादंबरीतून

2009-02-05T08:46:00.000-08:00

रानकुत्र्यांच्या सहा टोळ्यांपैकी एका टोळीचे पुढारपण एका एकाक्ष कुत्रीकडे होते. ही मोठी बेरकी, हिकमती, धूर्तहोती. विषारी मांसाला तिने कधी तोंड लावलं नाही. इरुला जमातीनं लावलेल्या सापळ्यात ती कधी सापडली नाही. ती तरूण होती तेव्हा तिने दरवर्षी पिलावळ दिली होती आणि नंतर टोळीचे पुढारपण तिच्याकडे आले होते. सैतानाचा जन्म झाल्यानंतर आणखी दोन वर्षे तिने टोळी सांभाळली. तिच्या राज्याचा कोपरा न कोपरा तिला पाठहोता. दिवसभर तिचा वावर असे. ती शिकार एकतर सकाळी करी किंवा संध्याकाळी. तिने कधीही रात्री शिकार केली नाही. आपल्या प्रपेशीचे हे वैशिष्ट्य तिने जपले, टोळीतल्यांना शिकवले. आपली टोळी तिने फारशी मोठी होऊदिली नव्हती. शिकारीवरून मांसाच्या वाट्यांवरून टोळीत कधी भांडण होऊ नये म्हणून तिने ही खबरदारी घेतली असेल. शिकार शोधणे , हेरणे, भक्ष्याची सर्व बाजूंनी नाकेबंदी करणे याबद्दल ती जागरूक असे. एकदा भक्ष्य हेरले की ते कितीही मोठे असो, शूर असो, त्याचा पाठलाग करून त्याला जेरीस आणून ते पाडायचेच अशी तिची पद्धत होती. तिच्या टोळीत एकजूट होती आणि निर्णय तिचा एकटीचा असे. तिची एवढी दहशत होती ,की तिच्या टोळीनेवेढलेले हरण किंवा सांबरच काय पण रानडुक्करही मूढासारखे जमिनीकडे बघत राही, आणि मृत्यूला सामोरे जाई. ही एकाक्षी दिसली की बिबळेसुध्दा छलांग मारून तिच्या टोळीपासून दूर पळत.
पण तिला जाणवत गेले, की आपली ताकद कमी पडू लागली आहे. वेगाने पळाले , उभा चढ़ चढला कीआपल्याला धाप लागते. जीभ तोंडाबाहेर येते, ल्हा ल्हा करते.
एक सकाळी ती हलली नाही. गोल गोल फिरून शरीराचे मुटकुळे करून , शेपटीचा गोंडा खालून वर लपेटून घेत ओघळीतल्या त्यांच्या निवारयाच्या जागी ती रात्री पडून राहिली होती.
सकाळ झाली तरी ती तशीच राहिली. टोळी जरा वेळ घुटमळली. थांबली. भांबावली. मग एक धिप्पाड नर पुढेझाला. त्याने विशिष्ट प्रकारे भुंकून इशारा केला आणि तो निघाला. त्याच्या शेपटीच्या गोंड्याची दिशा धरून दूसरा. त्याच्या मागोमाग तिसरा. बघता बघता सहा माद्या आणि नऊ नरांची ही टोळी निघून गेली. मागे तळावर एक अगदी टेकलेली मादी आणि तरण्या दोन माद्यांची मिळून पंधरा पिले होती. एकाक्षीने तळाचा ताबा घेतला .पिलांना दिवसभर सांभाळले. सायंकाळी शिकार करून , परस्पर खाऊन टोळी परतली. त्यांनी एकाक्षी व प्रसूतीसाठी मागे राहिलेली मादी यांच्यासाठी शिकारीतला त्यांचा हिस्सा आणला.
आता तिचे इथून पुढे जितके आयुष्य असेल तितका काल ती तळावरच राहणार होती आणि इतरांची पिले सांभाळणार होती. त्याबद्दल तिचा वाटा तिला पोचता केला जाणार होता. नाहीतरी पिले सांभाळायला अशी ख़बरदार वडीलधारी कुत्री हवीच होती. टोळीची ही निकड तूर्त एकाक्षीन भागवली होती. पुढे दोनतीन वर्षांत तिची जागारिकामी होईल. पण जगाच्या नियमाप्रमाने कोणतीही जागा कायमची रिकामी कधी राहत नाही. ती भरेल. एकाक्षीची स्मृती कोणाला राहणार नाही. आज ती दहा वर्षांची झाली होती. आता तिचे आयुष्य संपत आले होते. ती या रानात दहा पावसाळे जगली. अजून फारतर ती दोनएक पावसाळे जगणार होती. तिच्या स्मृतिसंचयात फारसे काही शिल्लक नव्हते. हातात धरलेली वाळू कणाकणाने मुठीतून झरून जावी तसा आयुष्याचा एकेक क्षण निघून गेला होता : भूक भागवण्यात, तहान शांत करण्यात , थंडी-पावसात रात्री आडोशाच्या जागी आणि कहारी उन्हाळ्यात गार फुफाट्यात शरीराचे वेटोळे करून पडून राहण्यात , दरवर्षी जुगण्यात , पिलांना जन्म देण्यात , त्यांना अंगावर पाजण्यात , पाठलागात , पारध करण्यात . भक्ष्याचे गरम रक्त. ताजे मांस. सावजाचा काढलेलाताणपट्टा. शेवटची झड़प. सावजाची तडफ़ड. रोज नवी शिकार. नवे आव्हान. सगळे रान तिचे होते. ती इथेच जन्माला आली . तिने काही नाही तरी आठएक वेळा वेते दिली. इथेच ती अखेरचा श्वास घेणार होती. तिच्या लेखी भूतकाळ नव्हता आणि तिला भविष्याची चिंता माहितच नव्हती. तिला फक्त वर्तमानक्षण समजत होता. प्रत्येक वर्तमानक्षणासाठी ती जगली होंती.
........
'अरण्यकांड' या कादंबरीतून
लेखक: अनंत मनोहर
मौज प्रकाशन

फ़ँटॅस्टिक-रत्नाकर मतकरी

2009-01-25T09:02:00.000-08:00

गूढकथा म्हणजे केवळ रहस्यकथा नव्हेत.
मानवी मनाला जे गूढ़ वाटतं ते सारं काही त्यात येतं.
मरणाची कल्पना आपल्याला गूढ़ वाटते. त्यामुळे मरणाशी
संबंधित असलेल्या , पिशाच्चयोनी , पुनर्जन्म यासारख्या गोष्टी आपल्याला गूढ़ वाटतात.
परंतु प्रत्यक्ष जीवनामधेही, द्रष्टेपणा , स्वप्ने, आभास , इच्छाशक्ती ,
अंतर्ज्ञान यांसारख्या अनेक गूढ़ गोष्टी असतातच.
आणि माणसाचं मन ? -त्याचे अनेक व्यापार.....स्पष्टीकरणाच्यापलीकडचे-
या सगळ्यांनी तयार झालेली रत्नाकर मतकरींची गूढकथा.... तिचं वैशिष्ट्य हेच आहे की ती इतकी 'फ़ँन्टॅस्टिक' असूनही आपली वास्तवाची बैठक सोडत नाही.....
त्यांच्या कथेतला आशय टोकाचा कल्पनाविलास करतानाही वास्तवाच्या पातळीवर तितकाच सच्चा ठरतो.
मतकरींच्या गाजलेल्या कथांपैकी , त्यांनीच निवडलेल्या पंधरा-वीस नितांतसुंदर कथांचा संग्रह फ़ँटॅस्टिक .
फ़ँटॅस्टिक
लेखक: रत्नाकर मतकरी
आरती प्रकाशन

द पिक्चर ऑफ़ डोरियन ग्रे-ऑस्कर वाइल्ड

2009-01-15T07:47:00.000-08:00

सुप्रसिध्द ब्रिटिश लेखक ऑस्कर वाइल्ड (Oscar Wild), (१८५४-१९००), यांची 'द पिक्चर ऑफ़ डोरियन ग्रे' ही कादंबरी १८९१ मध्ये प्रसिध्द झाली. तेव्हा तिनं प्रचंड खळबळ उडवली होती. कला, सौंदर्यशास्त्र, समाजशास्त्र या विषयांवरील गंभीर लेखक (The critic as an artist, The Soul Of Man Under socialism), कवी आणि कथाकार ( poems, The Happy Prince & Other Stories, The House Of Pomegranates) , नाटककार (Lady Windermere's Fan, Woman of no importance, An ideal Husband, The Importance Of Being Earnest) म्हणून ते सुपरिचित असले , तरी मुख्यत: ते picture Of Dorian Gray चित्ररूप कादंबरीचे लेखक म्हणूनच त्यांची विशेष प्रसिद्धी आहे.

एक निरागस तरूणाला मिळालेला चिरतारूण्याचा वर आणि त्यानं स्वत:च्या हातानं करून घेतलेलं आत्मिक अध:पतन. त्याला पापाच्या काठावर नेऊन पोहोचवणारं मोहक तत्वज्ञान...
त्यातूनच माणसाचं बहकणारं मन आणि त्याची सदसदविवेकबुध्दी यांच्यातला संघर्ष चित्ररूप होऊन आपल्याडोळ्यांसमोर उभा राहतो.
वास्तवता आणि अद्धुतरम्यता, कोमलता आणि क्रौर्य यांच विलक्षण मिश्रण या कादंबरीत आहे.
लेखकाच्या रंगदार आणि काव्यात्म शैलीमुळे हे चित्र अधिकच देखणं आणि गहिरं होतं...
द पिक्चर ऑफ़ डोरियन ग्रे
मूळ लेखक: ऑस्कर वाइल्ड
अनुवाद : वि.शं. ठकार

आत्मचरित्राऐवजी-जयवंत दळवी

2009-01-05T23:40:00.000-08:00

आत्मचरित्रे ही सर्वसाधारणपणे आत्मसमर्थनार्थ लिहीली जातात, असे जयवंत दळवींचे मत होते. खरेखुरेआत्मचरित्र लिहिण्याचे धैर्य नसेल तर भल्या माणसाने आत्मचरित्र लिहू नये असेही ते म्हणत असत.
प्रस्तुतच्या पुस्तकात दळवींच्या आत्मपर लेखांचे विलोभनीय दर्शन घडते. मत्स्याहार प्रिय असलेले रसिकखवय्ये म्हणून त्यांचे दर्शन ' माझे खाणेपिणे माझा मत्स्यावतार ', 'अनंताश्रम' ,'भंडारी हॉटेल' यांसारख्या लेखांतून घडते. कुटुंबातले दळवी 'माझ्या कुटुंबात मी' मधून उभे रहातात. 'दादरचे दिवस', 'आठवणीतली वास्तू' यांसारखे लेख त्यांच्यातील व्रात्य मुलाची आठवण करून देतात. 'आपुले मरण पाहिले म्या डोळा' यासारख्या लेखातून ते आपल्या मृत्युकडे ज्या खेळकरपणाने पहातात, आणि जय विनोदी ढंगात पेश करतात, ते अविस्मरणीय आहे. नाट्यक्षेत्रातल्या स्वःताच्या पडेल पदार्पणावरही ते तेवढ्याच खेळकरपणाने लिहितात. 'धी वर्ल्ड इज लाइक धिस' हा युसिसमधील नोकरीच्या काळातील अमेरिकन अधिकारयांविषयीचा लेख वैशिष्ट्यपूर्ण आहे. 'माझ्यासाहित्यातील धर्म' व 'देहधर्म', 'चक्र' शी नसलेला संबंध' या लेखांतून साहित्यिक दळवींचे दर्शन घडते.
दळवींची शैली ही अत्यंत पारदर्शक आहे. दळवींच्या आयुष्यातील व्यक्ती-घटना-प्रसंग या विषयींचे हे मार्मिकलेखन गजालीच्या स्वरूपात वाचकांसमोर उलगडत जाते आणि वाचक त्यात गुंतत जातो.

आत्मचरित्राऐवजी
-जयवंत दळवी
सौजन्य: मॅजेस्टिक प्रकाशन

अवकाशाशी जडले नाते-नारायण धारप

2008-12-25T23:02:00.000-08:00

ही एक विज्ञान कादंबरी आहे.
'स्टार ब्रिज' या जँक विल्यमसन आणि जेम्स गन यांच्या मूळ पाश्च्यात्य कादंबरीचा अनुवाद.
गेल्या काही वर्षात आपल्या समाजाची
अशी काही घडण झाली की, शेल्डन, विल्बर स्मिथ, फोरसीथ,, लुडलम,इरविंग,
हेराल्ड रॉबिन्स, आर्थर हेली आणखी एक दोन असे अपवाद वगळता एकून इंग्रजी साहित्याच्या वाचनाचे प्रमाणकमी होत आहे; आणि विज्ञानकथांचे तर त्याहून कमी होत आहे; आणि वाचक नाहीत म्हणून पुस्तकांचीउपलब्धीही कमी होत आहे.
'स्टार ब्रिज' आणि यांसारख्या अनेक उत्तम कथा यांच अस्तित्व विचक्षण वाचाकाना ज्ञात होणार नाही; आणि अशाउत्तम कथांच्या आस्वादापासून ते वंचितच राहतील.
अशा चोखंदळ, अभिरूचिपूर्ण वाचकांसाठी
ही कादंबरी म्हणजे बौद्धिक मेजवानीच आहे.

अवकाशाशी जडले नाते
अनुवाद: नारायण धारप
सौजन्य: मेहता पब्लिशिंग हाउस
Author: Jack Williamson & James Gun
Novel: Star Bridge

मध्यस्थ-फ्रेडरिक फोरसीथ

2008-12-15T21:51:00.000-08:00

ऑक्सफोर्डशाय्ररमधल्या एका गावरस्त्यावरून एक युवकाचे अपहरण हा
अमेरिकेच्या अध्यक्षाला त्याच्या पदावरून हुसकावून लावण्याच्या आत्यंतिक क्रूर
अशा कारस्थान-नाट्यातील पहिला प्राणांतिक अंक होता. तो यशस्वीरीत्या पार
पाडला गेला, तर हा अध्यक्ष या अनपेक्षित धक्क्याने मानसिक आणि भावनिकदृष्टया
खचून अकार्यक्षम होईल, हा एकमेव हेतू या अपहरणामागे होता.

हा दुर्दैवी प्रकार जगातील फक्त एकाच व्यक्ती थोपवून धरू शकत होती- क्विन!
अपहरणाच्या अशा प्रकारांमध्ये सातत्याने यशस्वी ठरलेला जगद्विख्यात मध्यस्थ.

या अपहरणनाट्याचा उलगडा होत असताना श्वास रोखून ठेवणा॒रया औत्सुक्याने
वाचक कधी कमालीचा उत्तेजित होतो. कधी आश्चर्याने चकित होतो, कधी अंगावर
कोसळणारया तपशीलामुळे गोठल्यासारखा होतो. फ्रेडरिक फोरसिथ या जागतिक
कीर्तीच्या लेखकाने विलक्षण कौशल्याने विणलेली ही चित्तचक्षुचमत्कारिक कहाणी
वाचताना थरारक अनुभवांमुळे तुम्ही पानापानावर स्तंभित होणार आहात।

मध्यस्थ-फ्रेडरिक फोरसीथ
मराठी अनुवाद: सौ. सोहनी
सौजन्य: मेहता पब्लिशिंग हाउस
(The Negotiator by Frederick Foresyth)

'बिस्मार्क'ची शिकार

2008-12-05T19:41:00.000-08:00

१९३९ सालचा में महीना होता. महायुध्दाला सुरूवात होउन अठरा महीने लोटले होते. या अठरा महिन्यांत जर्मनीची सतत सरशी होत होती.पश्चिम युरोपातील छोटी छोटी राज्ये शिस्तबध्द , आक्रमक जर्मन युध्दयंत्रणेने तेव्हाच धुळीला मिळवली होती.

फ्रांसच्या सरहद्दीवर असलेली अभेद्य मॅजिनो तटबंदी,
जर्मन सेनेच्या पहिल्या धड़कीसरशी कोलमडून पडली होती.
यथाकाल फ्रान्सचा पाड़ाव झाला. खांद्याला खांदा भिडवून लढणारा
ब्रिटनचा मित्र गमावला.ब्रिटन एकाकी झाले.

एकाकी पडलेल्या ब्रिटनला उखडून टाकण्यासाठी हिटलरने
आपले सगळे सामर्थ्य एकवटले. जर्मन विमानांनी ब्रिटनव्रर भीषण बाँबफेक करून
ब्रिटनची भूमी
आणि ब्रिटनचे मनोधैर्य बेचिराख करण्याचा निकराचा प्रयत्न चालू केला.
त्याच्याच जोडीला जर्मन पाणबुड्यांनी आणि लढाऊ नौकांनी
ब्रिटनचे सागरीमार्ग रोखून , अन्नधान्य आणणारया बोटी बुडवण्याचा सपाटा चालवला.

स्कार्नहॉर्स्ट , नायसेनोव, अडमिरल स्कीअर या जर्मन युध्दनौकांनी
काही काळ ब्रिटिश जनतेचा थरकाप उडवला होता. पण पंतप्रधान विंस्टन चर्चिल,
ब्रिटिश युध्दयंत्रणा अणि सामान्य जनता यांनी या संकटाला असीम धैर्याने तोंड दिले.

पिढ्यानपिढ्या पोवाडे गातील, असे रोमहर्षक पराक्रम गाजवले.
'बिस्मार्क'ची शिकार ही अशाच एक पराक्रमाची कहाणी होय.

'बिस्मार्क'ची शिकार (SINK THE BISMARK BY FRANK BRANOD)
अनुवाद: अनंत भावे
सौजन्य: मेहता पब्लिशिंग हाउस

साप-समज गैरसमज

2008-11-29T10:10:00.001-08:00

अरे बापरे...साप! -साप दिसला की आपली पहिली प्रतिक्रिया ही असते. प्रत्येक साप हा विषारीच असणार, तो आपल्याला चावणार आणि त्यामुळे आपण मरणार ; ही अंधश्रध्दा सर्वसामान्य माणसाच्या मनात घर करून बसलेली आहे. त्यामुळे साप दिसला रे दिसला की त्याला मारून टाकणे हे आपल्याला आपले परम कर्तव्यच वाटते. सापाविषयी इतरही अनेक अंधश्रध्दा आपल्या मनात असतात.

सापांचे प्रकार किती? त्यांची वैशिष्टे कोणती? विषारी व बिनविषारी साप कोणते? अशी सर्व माहिती या पुस्तकातून मिळते.
त्याचसोबत सापांविषयीच्या विविध प्रश्नांची उत्तरे देत अंधश्रध्दांचे निराकरणही हे पुस्तक उत्तमरित्या करते.
साप-समज गैरसमज
लेखक:भालचंद्र मयेकर
प्रकाशन:मनोविकास प्रकाशन

जॅक लंडन ची अविस्मरणीय कादंबरी-व्हाइट फँग

2008-10-15T09:24:00.000-07:00

त्याची आई कुत्री होती॰
त्याचा जन्म लांड़ग्यांच्या कळपात झाला॰
या क्रूर जगात तो लहानचा मोठा झाला॰
कुत्र्यांशी त्याचं फक्त शत्रुत्वाचं नातं होतं॰
माणसांनी नेहमीचं त्याला झिडकारलं॰
खुनी म्हणूनचं त्याला सगळे ओळखत होते .
तो चोरी करून जगत होता॰
तो लांडगा होता का कुत्रा ते कधीच कोणी ठरवू शकलं नाही.
तो लांडग्यांपेक्षा हिंस्र होता॰
माणसांपेक्षा कुटिल होता॰
तो बुद्धिमान होता.
तो योद्धा होता.
एकांड्या,अस्थिर आणि रक्तरंजित वाटचालीत तो फक्त एकाच गोष्ट शोधत होता, ... प्रेम!'
मानवी वाटावी एवढी हळूवार, चिंतनशील तरीही अविस्मरणीय कहाणी॰
अवश्य वाचा- जॅक लंडन ची अविस्मरणीय कादंबरी-व्हाइट फँग
मराठी अनुवाद :लांडगा
लेखक :अनंत सामंत
सौजन्य: मॅजेस्टिक प्रकाशन

गेले, ते दिन गेले

2008-10-07T22:08:00.000-07:00

वाचून झाल्यावर मनाला हुरहूर लावणारी कहाणी.
मार्सेल पॅग्नोल यांच्या 'दी डेज वेअर टू शॉर्ट ' या आत्मचरित्राचे 'गेले, ते दिन गेले ' हे विलास फडके यांनीकेलेले स्वैर भाषांतर॰दिसायला बाहुलीसारखी नाजुक व सुंदर अशी आई, शाळेत शिक्षक असणारे वडील आणि घराण्याचा वारसा लाभलेल्या इसमाचे बालपण विशेष ते काय असणार? पण अशा सामान्य माणसांच्या कुटुंबात एकमेकांवर असणारं प्रेम, नीतिमुल्यांची चाड, लिलिसारख्या बालमित्राची निरपेक्षदोस्ती हे सारं मार्सेल पॅग्नोल यांनी इतकं हुबेहूब चितारलं आहे की, वाचकाला ते स्वतःचचं वाटावं.प्रख्यात फ्रेंच नाटककार,फ्रेंच अकादमीद्वारा सन्मानित मार्सेल पॅग्नोल आपलं बालपण एखाद्या चित्रपटकथेप्रमाणे रंगवू शकले असते; पण त्यातही त्यांनी बालपणाचा निर्व्याजपणा कायम ठेवावा आणि ते दिवस फारच लौकर संपले याविषयी हळहळ व्यक्त करावी याचं कारण ही कहाणी वाचल्यावरच समजेल.
गेले , ते दिन गेले
लेखक:मार्सेल पँग्नोल
अनुवादक: विलास फडके ,
Novel:(The days are too short-Marsel Pagnol)

एका रानवेड्याची शोधयात्रा-कृष्णमेघ कुंटे

2008-09-05T03:33:00.000-07:00

रसायनशास्त्रातल्या महाविद्यालयीन परीक्षेत अनुत्तीर्ण झाल्यामुळे हाती आलेलं फावलं वर्ष मदुमलाईच्या जंगलातप्राणीनिरीक्षणात घालवण्याची संधी मिळाली आणि कृष्णमेघच्या मनात लहानपणापासूनच दडलेलं जंगलप्रेमउफाळून आलं. तो वर्षभर त्या जंगलात राहिला, पण एखाद्या 'उपऱ्यां ' निरिक्षकसारखा नाही तर खऱ्यांखुऱ्यां जंगलपुत्रासारखा राहिला.
त्या जंगलातले हत्ती,रानगवे,रानकुत्री,अस्वले,यांच्यासारख्या प्राण्यांचं मनमुक्त जीवन त्यानं एखाद्या सहनिवाशाच्या भूमिकेतून निरखलं-पारखलं. त्याच्या या शोधयात्रेत आलेल्या सुंदर,थरारक,रोमांचक अनुभवांचं हे नितळ पारदर्शी संकलन म्हणजे जंगलस्त्रोत्रात न्हाउन निघालेले आणि वाचकांना रानवेडाची दीक्षा देणारं 'मदुमलाई' सूक्त आहे।.
कृष्णमेघ जेथे रमला त्या मदुमलाईच्या प्रेमात पाडणारं....आणि त्याच्या नजरेतून जे निसटलं त्याबद्दल हूरहूर लावणारं...

सौजन्य-राजहंस प्रकाशन,पुणे

Lcve MARATHI, feel MARATHI